Шкетан лӱмеш театрлан – 105 ий, шкаланже – 45 ий, театрыш пашаш толмыжлан – 25 ий. Лач тыгай пайрем-влакым пеленже палемдаш ӱжеш М.Шкетан лӱмеш театрын ик эн ойыртемалтше актрисыже Светлана Филиппова 19 декабрьыште. Тунам «Йӧратымаш да кӧгӧрчен-влак» постановко дене бенефисым эртара.
ИЗИШ АПТЫРАНЫШЫРАК, ВОЖЫЛШЫРАК
Пытартыш жапыште тудын рольжо поснак шуко. Утларакшым – весела койышан, вуйым сакыдыме, шотым муын моштышо ӱдырамаш-влак. Тиде «Эчан вате» (С.Николаев, «Салика»), Глафира (Арсий Волков, «Оръеҥ мелна»), Ведаси (Н.Арбан, «Кеҥеж йӱд), Шкет вате (Г.Гордеев, «Сӧсна поминка»), Ава (М.Хейфец, «Кузе гын марлан лекташ огыл»), Серапи (С.Чавайн, «Окса тул), Инна (В.Красногоров, «Ӱдыр таҥлан сай пелаш») да молат.
«Тиде кокымшо бенефисем. Икымше гана тудым 8 ий ончыч «Оръеҥ мелна» спектакль дене эртаренам ыле. Тынар ий жапыште у роль-влак погыненыт, шкежат вашталтынам, шуаралтынам. Тений театрын, мыйынат – лӱмгече, сценыштат шукертак модам. Тыге уэш калыкым погаш шонен пыштышым. Вашке Еш идалык мучашлалтеш, садлан тудым «Йӧратымаш да кӧгӧрчен-влак» спектакль дене ужаташ шотлан толеш манын шоналтышым. Адакшым тӱвыра колледжым пырля тунем лекше кум актрисе: Марина Почтенева, Люда Казанцева да мый – чыланат тыште модына», – ойла С.Филиппова.
«Светлана, а тый спектакльлаште чоҥымо образет-влак семынак чолга улат?» – пеш палынем. «Мый изиш аптыранышырак, вожылшырак, тыматле (скромный) улам. Но оптимист лияш тыршем. Шӱлыкын илаш неле. Эре шкем нӧлтыман, мемнан профессийыште – поснак. Садлан иктаж-мом ышташ кӱлмеке але темлымеке, шканем кызыт «Кӱлеш тидым ышташ, Света, кӱлеш!» манам. Бенефис шотыштат – тыгак»,– ойла актрисе.
Южо актёр шке йӧратыме рольжо нерген пеш куанен каласкала. Уло мо тыгай роль Светланан? «Ме кажне рольым тылзе, тылзе утла дене ямдылена. Тудо шӱмыш тунар возеш, тунар шыҥа, вара тыйынак лиеш: вет корнышто улат ма але мӧҥгыштӧ кочкаш шолтет – эре роль нергенак шонет. Премьер деч ончыч йӱдымат кынел возат. Кажныже мылам лишыл. Кидысе парня семынак: иктыже – вичкыж, весыже – кӱжгырак, кумшыжо – кужурак, нылымшыже – кӱчык. Но чыла парняжат мыйын парня улыт, садлан чылаштым йӧратем. Чын, южгунам роль куштылгынрак пуалтеш, южгунам – нелынрак. Теве ӧрдыж гыч ончымаште йомак пеш куштылгын коеш, а южгунам тусо рольым, мӧҥгешла, утларак тыршен, сайракын модман.
«Актёр профессий тылат илышыштет куаным конда?» йодышемлан Светлана тыгерак вашештыш: «Тиде мыйын йӧратыме профессием. Мый пашаш уло кумылын коштам. Шукын актёр-влак кузе тыге пашам ыштеда маныт. Ме вет кажне кечын гаяк театрыште улына: 14 шагат марте репетиций, вара кастене – спектакль. Шуматкече-рушарнян моло канат, ме адак театрыш куржына. Тыгай режимлан тунем шуынна, садлан вич кече пашам ышташ да кок кече канаш… Тыге иленжат ом мошто. Яра жап шукырак лекмеке, уэш театрыш кайыме веле шуэш. Пел ӱмырнам тушто эртарена да… Садлан куаным конда, манам».
КӰКШӦ ТАГАНАН КАТА
Театрыш толмекыже, кужурак капан улмыжлан туддеч шукын «Тый финнке але эстонко отыл?» манын йодыныт. Кужу кап шотышто Светланан ондак эре аптыранымаш лийын.
«А колледжыште тунеммем годым икана туныктышына Зинаида Васильевна Долгова ойла: «Эрла чылан кӱкшӧ таганан туфльым чиен толыда. Мыйын занятийыш туфльо дене веле коштман. Мый урок деч вара кодым да Зинаида Васильевналан кужу кап шотышто ойлаш тӱҥальым, туфльо дене эше кужурак коям, ом чий тудым манам», – шарналта актрисе. А Зинаида Васильевна Светланам куэ гай лывырге кужу капан улмыжлан мокталтен веле, тый тидден кугешнышаш улат манын. Вара весе мокталтен.
Тиддеч вара ӱдырын тыгай вожылмаш йомын. Светлана студент годым эсогыл модель семын подиумыштат коштын. Кызыт тудын сценыште таганан ката дене ковыртатыл ошкылмыжым чӱчкыдын ужына.
С.Филиппова колледжыште туныктышо В.А.Пектеевлан, Г.Н.Иванова Ямаевалан да молылан кызытат таушта.
АЧАЖ МОГЫРЫШ КАЕН
Светланан ачаже Валерий Николаевич кужу капан лийын, аваже – изи веле. Ӱдыр Татарстан Республикысе Зеленодольск олаште шочын. Ача-аваже тушто военный заводышто ыштеныт. Но пачерым вучен шуктыдымылан кӧра Светланан ныл ияш улмыж годым Волжский район Куэрласола ялышке пӧртылыныт. Тушто Светан коваже илен. Ты жапыште лач Газпром организаций КС-22 компрессор станцийым чоҥа улмаш. Пачерым налаш манын, аваже Любовь Максимовна тушко пашаш пурен, штукатур-малярлан ышташ тӱҥалын, ачаже сварщик лийын.
Тыге У Порат селаште (шкешт Финский маныт) пачерым пуэныт, да Света кокымшо класс гыч тушто тунемын. Ачаже шукертак илыш гыч каен, авашт кызыт Куэрласолаште ила. Светан акаже У Поратыште верланен. Кум ӱдырамаш чыланат пеледышым моткоч йӧратат. Кеҥеж-шыжым шуко мотор пеледыш аваштын пакчам сӧрастара. Йомакысе тӱняш логалме гай веле чучеш.
АВАТ КӦЛАН ПАШАМ ЫШТА?
Света шкежат шукертак ешым поген. 14 ияш Катя ӱдыржӧ ден 16 ияш Никита эргыже школышто 8-ше да 10-шо класслаште шинчымашым погат. Изиракышт годым нуно аваштым ончаш театрыш коштыныт, репетицийышкат пырля налаш верештын.
Икана нунын дене тыгай оҥай ситуаций лийын каен. «Кугуракше иктаж вич ияш, изиракше кум ияш лийыныт, очыни. Нуным буфетыш шынден коденам, шкеже репетиций залыш каенам. Вара тушко миеда манын каласенам. Йоча-шамыч мыйым йомдареныт да шортын шогеныт. Нуным театрыште ыштыше ик еҥ ужын да йодын: «Авадам йомдаренда мо? Кӧлан тудо тыште пашам ышта?» «Кикиморылан», –вашештеныт йочам-влак. Тунам спектакльыште лач тыгай рольым модынам», – шыргыжал шарналта ту жапым С.Филиппова. А кызыт йоча-шамыч кугем шуыныт да спектакльыш шуэнрак коштыт.
Светан Сергей пелашыже – оласе руш, иномарке-влакым ачалыме шотышто ик эн сай специалист. Тудат театрыш южгунам веле толын кая. «Садлан мӧҥгыштӧ театр нерген пешыжак огына кутыркале. Йоча-шамычым вурсаш монь тӱҥалам да «Ой, авай, театрыштет кычкыркале, а тыште огыл, маныт. Такшым мый пушкыдырак ава улам, йоча-шамычлан утларакшым йолташ лияш тыршем», – ойла умбакыже Светлана.
Света – тыгак сай озавате. Мӧҥгыштӧ тӱрлӧ кочкышым ышташ йӧрата, кӱэшташ пеш мастар. Ӱдыржат туддечак тидлан тунем шуын. Тудо эше унам вашлияш йӧрата. Светалан ӱстелым моторын сӧрастараш (сервироватлаш) келша. Вет Петербургышто актёрлан тунеммыж годым тудо чапле ресторанлаште официанткылан тыршен, чыла тидлан тунемын. Повар-влакын кочкаш ямдылымыштым эре эскерен, рецепт-влакым возен налын, садлан кызыт ешыжым да уна-влакым тӱрлӧ тамле кочкыш дене сийла. Тыгак тудо путешествоватлаш йӧрата. Пытартыш жапыште Марина Почтенева йолташыж дене кажне ийын тӱрлӧ верыш коштыт. Сочиште, Египетыште, Араб Эмиратыште лийыныт. Светан пелашыже самолёт дене чоҥешташ лӱдеш, Маринан марийжат канаш кошташ пешыжак ок тарване. Но ватыштын путешествоватлаш йӧратымыштым умылат да шулдырыштым огыт пӱч.
Тек чыла шонымашет шукталтеш, Светлана. Вет тений тылат 45 ий веле темеш. Ойлат вет, 45 ияш ӱдырамаш – олыкысо мӧр пеледыш. Пелед, тӱзлане, куане илышлан да куандаре мемнам у роль-влак дене!
Еш альбом гыч налме фото-влак.