Йочам годсо ик историй дене палдарем. Кузе тыге лийын кертын, кызытат ӧрам.
Тунам шым ияш улам ыле. Ялысе пӧртыштӧ мый, авам да коча-ковам пырля иленна. Авам чӱчкыдын йӱд сменыш пашаш коштын, а кочам ден ковам пенсионер лийыныт.
Кочам кочывӱдым подылаш йӧратен. Авам ден ковам тудым эре вурсеныт, но кочам шотыш налын огыл: шкеж гаяк «йолташыже-шамыч» дене кечыгут шинчылтеш да кастене гына мӧҥгӧ толын пура ыле.
Икана кастене ковам дене диваныште телевизорым ончен шинчена. Кенета кудывечыште капка йӱк шоктыш. Ковам куржын лекте да пеш вурседылеш: «Шоҥго, йӱд марте перныл коштат! Мӧҥгат ом пурто теве, куш миенат, тушкак кай!» Чот сырыше ковам пӧртыш пурен шогалят, омсам тӱкылыш.
Воктекем толын шинче веле, омсам тӱкалыме йӱк шоктыш. Икмыняр жап гыч чотрак пералтышт, вара – адак. Да йӧршеш шыпланыш. Ковам ыш чыте, омсам почаш кайыш. А тушто иктат уке. «Йолташыже-шамыч дек адак каен докан» манын, диваныш толын шинче.
Вара, кочамын шылтыме кленчажым муаш шонен, малыме верже дек тарваныш. Лач тунам томаша тӱҥале: кочам вакшышыштыжак киен улмаш. Ковам тудым помыжалтарынеже ыле, но капше йӱкшашат тӱҥалын. Кунам тудо вакшышыш толын возын шуктен, ала?.. Вурседылме деч утлаш шонен, шыпак пӧртыш пурен да малаш возын дыр.
Кушкын шумекем, ковам дене тудо кече нерген ик гана огыл кутыренам. Но тунам кудывечыште кочамак лийын, манеш.
АЛЕКСАНДР.
Звенигово район.