6 февральыште Москошто «Россия-2024» выставке почылтын.
Россий Художник ушемын уста еҥже-влакын пашаштым кум залыште ончыктымо. Рӱдӧ ончерым У Третьяковкышто (Третьяковский галерейын кокымшо зданийыштыже) келыштарыме. Кокымшыжо Покровка уремысе выставочный залыште лийын, кумшыжо – Москосо художник-влакын отделенийыштын залыштыже.
Россий Художник ушемын Марий Элысе пӧлкажым вуйлатыше Анна Санникова каласкалыш:
– Ты ончерыште Российысе сӱретче-влакын чылаже 900 утла пашаштым ончыктымо. А Марий Элыште илыше куд художникын пашажым вераҥдыме. Тидлан ондак республикыштына ончерым чумыренна ыле. Тушечын эн ончыч 14 еҥым ойырен налыныт, вара зал шыгырлан кӧра эше угыч онченыт. Тыге Россий Художник ушемын сӱретчыже-влак Андрей Санниковын, Анна Санникован, Евгений Ярановын, Валерий Чеботкинын, скульптор Анатолий Медведевын, керамист Юлия Смирнован пашашт всероссийский ончерыш логалыныт. Ме Москош Евгений Герасимович дене коктын миен коштынна.
Москошто ончыкталтше куд паша кокла гыч марий тӱвырам ончыктымаште кокытшым ойырен каласыман. Керамист Юлия Смирнова марий орнаментан изи да кугурак кубым темла. Тудым «Баланс» манын лӱмден. Анна Санникован сӱретше «Кумалмаш» маналтеш. Тушто онаеҥын тӧтыретпучым пуалтарыше онаеҥым да тудын йыр сукен шичше еҥ-влакым ужына. Чыланат марий тӱран вургемым чиеныт, ӱштым ӱшталыныт.
Тыгодымак специальный военный операций темат пурталтын. Е.Ярановын сӱретше «Донбассын суксыжо-влак» маналтеш. Тушто Совет Ушем годсо флаг кугу верым налеш, тыгак ош тувыран ӱдыр ошкылеш, а воктеныже йошкар дракон коеш…
8 февральыште Москошто Рӱдӧ художник пӧртыштӧ Россий Художник ушемын 14-ше погынжо эртаралтын. Тушто 2018-2023 ийласе пашам радамленыт да иктешленыт. Делегат-влак ушемым ончычсо семынак Андрей Ковальчуклан вуйлаташ ӱшаненыт. Тыгак погынышто ончыкылык планым каҥашышна.
Россий Художник ушемын Марий Элысе пӧлкаже кодшо ийын кугу пашам ыштен, «Большая Волга» выставкым чумырен, уна-влакым вашлийын. Тыгак регионысо пӧлкан молодёжный пӧлкажым ыштыме. 2024 ийыштат шке пашажым шуя да калыклан оҥай вашлиймаш ден мероприятий-влакым темла.
Эльвира Терентьева.
Фотом пӧлкан архивше гыч налме.