18 июльышто Марий Элым Вуйлатыше Юрий Зайцев куд ешлан «Родительская слава» орденын медальжым да «За достойное воспитание детей» почётан знакым кучыктен.
Юрий Зайцев ача-аван обязанностьшым сайын шуктымылан да элнан гражданинже-влакым шот дене ончен куштымылан тауштен.
«Родительская слава» орденым Марий Турек посёлко гыч Александр Геннадьевич ден Светлана Александровна Шуталевмытлан пуымо. Марий Эл Республикым Вуйлатышын «За достойное воспитание детей» почётан знакше дене Медведево районысо Пиясир (Нурма) села гыч Дмитриевмытым, Килемар районысо Нежныр села гыч Кропиновмытым, Волжский районысо Мучашъер ял гыч Кудрявцевмытым, Йошкар-Ола гыч Сараевмытым да Морко посёлко гыч Федоровмытым палемдыме.