1 мартыште Уфаште Марий Элым Вуйлатыше Ю.Зайцев Россий Президентын ПФО-со полномочный представитель пеленысе советын заседанийыштыже лийын.
Тудым Россий Президентын Юл кундем федеральный округышто полномочный представительже И.Комаров эртарен. Тушто ПФО-со кундемлаште илыше-влакын кучем ден верысе самоуправлений органлан ӱшанымашышт нерген каҥашеныт.
Игорь Комаров элнам вуйлатыше Владимир Путинын задачыж почеш шукталтше паша нерген ойлен. Ты шотышто мӧҥгешла вашкыл механизм почеш утларак пашам ышташ темлен, тыгодымак ЦУР (рушлаже – Центр управления регионами) полшымо дене.
СВО-што улшо-влакын ешыштлан полшымашат кучемлан ӱшаныме дене кылдалтын. Марий Элыште ик эн сайын виктарыме сомыллан мобилизоватлыме еҥ-влакын ешышт дене пашам ыштымашым шотлыман. Кундемыште ик эн ончыч салтак ден нунын ешыштлан полшымо мера-влакым палемдыме. Социальный паспортым ышташ кутырен келшыме. Моло кундемат тиде опытым шотыш налын пашам ышта.