Кызытсе илышыште рвезе гына огыл, ӱдырат сайын кучедал мошта. Теве Шернур район Горняк посёлкышто шочын-кушшо, ПГТУ-н чоҥымо паша да архитектур институтыштыжо 2-шо курсышто тунемше, «Арсенал» единоборство клубышко коштшо Татьяна Березина кучедалмаш дене кок ий заниматла да сеҥымашке шуын.
Тений 25-27 февральыште Йошкар-Олаште панкратион кучедалмаш дене эртыше Юл кундем федеральный округысо соревнвоанийыште 18 ияш ӱдыр-влак коклаште тудо 1-ше верым налын. Кызыт Татьяна 21-25 апрельыште Иркутск олашке Российысе таҥасымашке каяш ямдылалтеш.
Лӱддымӧ, чолга
Татьяна йочаж годсек чолга ӱдыр кушкын. Рвезе-влак дене иктӧр шоген, нунын дене пырля модын куржталыштын. Тыгодым спортым йӧратен. Шернур посёлкысо 1-ше №-ан школышто тунеммыж годым тудо куштылго атлетике дене заниматлен, ече дене талын мунчалтен, футболла, волейболла модын. Но чонжо кучедалаш эре ӱжын.
– Ешыште ме изам дене коктын улына. Ачам мемнам шкетын ончен куштен. Изиэм годсек мый пеҥгыде койыш-шоктышан, шонымашке шуаш тыршыше, лӱддымӧ улам. Спортын тӱрлӧ видыштыже шкем терген онченам, но кучедалмаш эре эн лишылла чучын. Шарнем, 5 классыште тунеммем годым, шкем тергаш манын, рвезе-влак дене ваш пижедылам ыле. Мыланем пеш келшен, – умылтарыш Татьяна.
Ӱдыр-влак кокла гыч шкетын
Школ деч вара 2020 ийыште Татьяна ПГТУ-шко чоҥымо паша да архитектур институтышко техносферный лӱдыкшыдымылык специальность дене тунемаш пурен. Олаш толмеке, йоча годсо шонымашыжым илышыш пурташ шонен. Икымше курс гыч «Арсенал» кучедалме клубышко возалтын. Таче тыште тудо ик тале борец. Кок ий жапыште тӱрлӧ приёмым шотыш налын, чын кучедалаш тунем шуын. Мо оҥайже: ӱдыр-влак кокла гыч Т.Березина шкетын гына тренировкыш коштеш. Тидлан кӧра тудлан шукыж годым рвезе-влак дене кучедалашыже логалеш.
Умбакыже 15 апрельыште лекше у номерыште лудса.