Шӱргыял школыштына «Марий сылнымут садвечыште» кружок пашам ышта. Тудым Елена Валериановна Григорьева вуйлата.
Сентябрь кыдалне мемнам, латвич тунемшым, тудо школнан ик эн мотор верышкыже, марий йылме кабинетыш, чумырыш. Ме ончыкылык пашана нерген кутырышна. Планым ыштышна. Мыйым старостылан ойырышт. Кружокышкына ме марий писатель-влакымат ӱжаш тӱҥалына. Тек нуно мемнан серыме почеламутнам лончылат, чын корным ончыктат.
Кодшо тунемме идалыкыште кружокнан эн чолга еҥже-влак Йошкар-Олаш миен коштыныт. Нунын коклаште мыят лийынам. Но, чаманен каласыман, эн виян тунемшына-влак Анастасия Михайлова ден Виктория Александрова школ гыч каеныт. Нуно школыштына эртаралтше керек-могай пайремыште эре вӱдышӧ лийыныт. Ӱшанен кодына: тиде кок ӱдыр умбакыжат марий шӱлышан кодеш. А ме молышт дене ты кугезе шӱлышым вияҥден толына. Тек мемнам у деч у сеҥымаш-влак вучат!
Стелла Кузнецова.
Морко район Шӱргыял школ.
Снимкыште: «Марий сылнымут садвечыште» кружокнан чолга тунемшыже-влак.