Кристина Краснова Коркатово лицейыште 11 «А» классыште тунемеш. Тудлан пӱртӱс мотор капкылым, йытыра чурийвылышым пуэн, эше талантым. Ӱдыр мураш пеш мастар. А почеламутшым кузе йоҥгалтара! Колыштын шерет ок тем.
Кристина тӱрлӧ конкурсышто сеҥыше радамыш шуко гана лектын. А шукерте огыл республикыште «Живая классика» конкурсышто «Прозаический произведений гыч ужашым рушла лудмо» номинацийыште сеҥен. Тудо «Молодая гвардия» роман гыч ава нерген ужашым каласкален.
Ты номинацийыштак Козьмодемьянскысе лицейыште тунемше-влак Полина Каткова (10-шо класс) ден Ульяна Галибина (6-шо класс) ойыртемалтыныт. Ӱдыр-влак ынде Марий Элын чапшым «Артек» тӱнямбал йоча лагерьыште аралаш тӱҥалыт. Нунылан туштат сеҥымашым тыланена.
А марий писатель-влакын произведенийыштым марла лудмаште Александр Милютин (Кужэҥер район Шорсола школ), Дмитрий Веденькин (Шернур посёлкысо 1-ше №-ан школ), Антон Алексеев (Морко посёлкысо 1-ше №-ан школ) сеҥышыш лектыныт.
В.Смирнов-Васильев.