Волжск олаште илыше 34 ияш ӱдырамашын пачерже гыч 39 тӱжем теҥгеаш телевизорым шолыштыныт. Оперативно-розыскной мероприятийым ыштымеке, шолыштшым муыныт. Арверым ондак судитлалтше 33 ияш пӧръеҥ луктын наҥгаен. Икмыняр ий ончыч тудо саде ӱдырамаш дене келшен улмаш, а пачер сравочым пӧртылтен огыл.
Йошкар-Олаште кодшо каныш кечылаште шке пачерыштыже колышо инвалид пӧръеҥым муыныт. Следственный комитетын пашаеҥже-влакын мутышт почеш, тудым янда пудырго дене пуштыныт.
Йошкар-Оласе Гагарин проспектыште верланыше ик организаций гыч полицийыш ӱдырамаш йыҥгыртен да шолыштшым кучымо нерген ойлен. Палыдыме ӱдырамаш кабинетыште нигӧ уке годым пурен да еҥ сумка гыч оксам луктын налнеже улмаш. Тиде жапыште ты организацийыште пашам ыштыше еҥ пурен да осал пашам ужын. Титаканым полиций пӧлкаш наҥгаеныт да тушто чыла рашемденыт. 38 ияш шолыштшо Волгоград область гыч улмаш. Тудо ондакат судитлалтше лийын.
Тылеч ончыч тудо Чехов уремысе ик организаций гыч 70 утла тӱжемым шолыштын лектын.
Курыкмарий районысо ик ялыште ала-кӧ ӱдырамашын Lada GRANTA машинашкыже йӱдым тулым пижыктен. Полиций пашаеҥ-влак тергеныт да титаканым муыныт. Машинам ондак судитлалтше 33 ияш ӱдырамаш йӱлалтен. Амалже – ушкалымаш. 200000 теҥгеаш эҥгек ышталтын.