Йошкар-Оласе ик банкыште 5000 теҥгеаш шоя оксам муыныт. Тудым ик кугу кевыт гыч конденыт улмаш. Тидын шотышто уголовный пашам тарватыме. Тидыже – регионышто тылзе тӱҥалтыш гыч кудымшо шоя окса. Тылеч ончыч тыгаяк шоя оксам Морко районышто муыныт.
Йошкар-Олаште илыше 33 ияш ӱдырамаш Интернетысе ик сайтыште электрон пианиным налаш уверым кычалын. Келшыше сатум муын, ужалыше дене соцкылыште возкаленыт. Вара налаш шонышо ӱдырамашлан ссылкым колтеныт. Тушко тудо банк карт данныйжым возен. Тыге картше гыч 28 тӱжем теҥге йомын.
Волжск олаште илыше пӧръеҥ Интернетыште машинам шулдын ужалыме нерген уверым ужын. Ужалыше тиде машина Москошто да тудым налаш кумылан ятыр еҥ улмо нерген ойлен. Сатум нигӧлан ынышт ужале манын, 50000 теҥгем колтен. Москош машиналан миен шумеке, ужалыше дене кыл йомын.
Медведево посёлкысо ик организаций гыч 13 шлифоватлыме машина йомын. Оперативно-розыскной мероприятийым эртарымеке, шолыштшо еҥым муыныт. Тыште пашам ыштыше 40 ияш пӧръеҥ арвер-влакым шолыштын да комиссионный кевытыш сдатлен.