Звенигово районысо Сӱзлэҥер ден Кокшайск лесничествыште 80 пушеҥгым шолып руэныт. Кызыт тергымаш паша кая.
Йошкар-Олаште илыше 47 ияш ӱдырамашлан банк пашаеҥ улам манын йыҥгыртеныт. Тудын лӱм дене мошенник-влак 150 тӱжем кредитым налыныт манын каласеныт да ты оксам пӧртылташ йодыныт. Ӱдырамаш чыла йодмым шуктен да вара веле ондалалтмыжым умылен.
Курыкмарий районышто 33 ияш ӱдырамашлан тыгак банк пашаеҥ улам манын йыҥгыртеныт да телефоныш толшо смс-кодым ойлаш йодыныт. Ӱдырамаш кодым ойлен, да картше гыч 70 тӱжем теҥге окса йомын.
Курыкмарий районысо Озёрка селаште 63 ияш пӧръеҥ КамАЗ машинам йӱдлан оролымо верыште коден. Эрдене толмыжлан машинан аккумуляторжо лийын огыл.
Медведево посёлкышто наркотикым шаркалыше 37 ияш пӧръеҥым кученыт. Пеленже 9 грамм синтетике веществам муыныт.
Морко посёлкышто илыше 38 ияш пӧръеҥын мӧҥгыштыжӧ коштымо кынем муыныт. 52 граммым тудо шканже ончен куштен. Уголовный кодексын 228 статьяжын 1 частьше почеш делам тарватыме.