ЙОШКАР-ОЛАШТЕ илыше 41 ияш ӱдырамашлан банк пашаеҥ улам манын йыҥгыртеныт. Тудын картше гыч оксам шолыштнешт манын увертареныт да оксам кызытеш вес счётыш колташ йодыныт. Тыге 16 ий жапыште погымо кок миллион утла теҥгем шолыштыныт.
ЙОШКАР-ОЛАШТЕ илыше 65 ияш пӧръеҥ Интернетысе ик сайтыште гаражым арендыш пуаш шонымыж нерген увертарен. Ик жап гыч
военный улам, гаражым налам манын каласеныт. Оксам колташ сӧреныт, но тидлан банкомат деке мияш йодыныт. Уверым пуышо пӧръен ондалалтын, 20 тӱжем оксам мошенниклан колтен.
КИРОВ кундем гыч 51 ияш пӧръеҥ Марий Элыш унала толын. Машина гыч документше йомын. Тидын нерген Интернетыш уверым пуэн. Вес кечын шулдо ак дене ужалыше кевытыште улына манын йыҥгыртеныт. Тудлан документ-влакым конденыт манын ойленыт, но оксам йодыныт. Кок гана кум тӱжем теҥгем колтымеке, йыҥгыртыше-влак йомыныт.
КУРЫКМАРИЙ район Лидӹвуй–Усола–Носола кугорнышто машинам йӱшывуя виктарыше 31 ияш пӧръеҥ шым еҥым тӱкен. Нунын кокла гыч нылытынже ийготыш шудымо йоча-влак лийыныт.