ЙОШКАР-ОЛАШТЕ 21 июльышто кастене ныл ияш йоча визымше пачаш гыч камвозын. Тиде кечын кастенак кум ияш йоча ӱмбак телевизор камвозын. Йоча-влак эмлымверыште улыт.
ВОЛЖСК олаште илыше 26 ияш рвезе ик социал сетьыште литой дискым заказатлен. Администратор дене мутланымеке, сатулан 19 тӱжем теҥгем колтен. Тидын деч вара ужалыше дене кыл йомын.
КУРЫКМАРИЙ районышто илыше 30 ияш ӱдырамашлан банк пашаеҥ улам манын йыҥгыртеныт. Картыште улшо оксам резерв счётыш колташ темленыт. Ӱдырамаш 30 тӱжем теҥгем аферист-влаклан колтен.
МЕДВЕДЕВО районышто 26 ияш ӱдырын 12 тӱжем теҥгеаш велосипедшым шолыштыныт. Оза кок ораван транспортым ик пӧртын икымше пачашыштыже коден улмаш. Трос замокым пӱчкын, велосипедым шолыштын каеныт.
ОРШАНКЕ районысо Табашино ер воктене канымыж годым 45 ияш пӧръеҥ вургемжым серыште коден, а шкеже йӱштылаш пурен. Лекмекыже, 9000 теҥгеаш телефон йоммым пален налын. Уголовный розыскын пашаеҥже-влак титакан еҥым муыныт. Ты селаште илыше ондак судитлалтше 31 ияш пӧръеҥ шолыштын улмаш.