Медведево район Новотроицк посёлко воктене 1 июльышто «Лада» ден ГАЗ машина-влак керылтыныт. Вашке полыш машина толын шумеке, «Ладам» виктарыше 37 ияш пӧръеҥ азап лийме верыштак колен. Пассажират нелын сусырген. Корно туткар лийме амал рашемдалтеш.
Советский районышто илыше 33 ияш ӱдырамашлан соцсетьыште палыдыме еҥ спорт модмашлан ставкым ышташ темлен. Ты «модышыш» ушнаш манын, 20 тӱжем теҥгем колташ йодын. Тылеч вара тудо сеҥышыш лектын манын увертарен, но модын налме оксам налаш процентым тӱлаш йодын. Тыге ӱдырамаш эше 48 тӱжем теҥгем колтен. Но сӧрымӧ окса озаж деке толын шуын огыл.
Звенигово районышто кум километр кужытан электровоштырым шолыштыныт. Полиций пашаеҥ-влакын увертарымышт почеш, сталеалюминиевый воштырым шым электропередаче линийлаште пӱчкыныт. 230 000 теҥгеаш эҥгек ышталтын.
Йошкар-Оласе Машиностроитель уремыште верланыше ик кевытыште пашам ыштыше палымыж деке пӧръеҥ пурен. Почешыже эше самырык рвезе миен. Кок пӧръеҥ коклаште умылыдымаш лектын. Самырык рвезе пӧръеҥым кырен да сумкажым шолыштын куржын. Титаканым муыныт, тиде шуко гана судитлалтше 21 ияш рвезе лийын.