Морко кундемыште тӱвыра алан пеш сай саскам пуэн шога. Илышын кажне шӧрынжым авалтен шукта. Шукерте огыл Морко районысо кажне тӱвыра пӧрт шке вершӧрысӧ калык дене Крешене пайремым палемден. Кораксола тӱвыра пӧртнат ӧрдыжеш кодын огыл.
Кинер кундемысе калыкым шкеж деке пагален ӱжын. Верысе калык, марий тувырым чиен, пайрем кочкыш дене Крешене пайремыш толын. Кораксола тӱвыра пӧртын икоян пашаеҥышт-влак унам порын вашлийыныт, ӱтелым погеныт. Тӱвыра пӧртнан художественный вуйлатышыже В.Г.Кириллова ончылгоч ямдылалтын.
А могай пайрем тале гармоньчо деч посна? «Муро кумыл» фольклор ансамбльнан чолга гармонистше, Ярансола ялын уста эргыже Вениамин Борисов Крешене пайремлан мемнан пелен лийын ыш керт. Кумылна пеш волыш. Но калыкым куандарыман, садлан Вероника Геннадьевналан вес гармоньчым муаш логале. Пайремна пеш сӧралын эртен кайыш.
Кораксола калыклан, тӱвыра пӧртнан пашаеҥже-влаклан, «Муро кумыл» фольклор ансамбльлан да, мутат уке, мемнан деке вуйым шупшде пагален толшо гармоньчо Олег Александровлан моткоч кугу таум каласыме шуэш.
Ынде Кораксола калыкым черетан Марий кас вуча. Тек ончыкшымат мемнан тӱвыра пӧртыштына тыге рӱж пайрем эртаралт шогаш тӱҥалеш. А тушко ушнышо калыклан чыланыштланат вуйнам вел савыме шуэш.
Елена Григорьева, Кораксола тӱвыра пӧрт вуйлатыше.
Снимкыште: Крешене пайремым эртарыме годым.