Звенигово район Красногорский посёлкысо автомобиль фургоным ыштыше заводлан 95 ий темын. Предприятийын тӱҥ сомылжылан оборонный да гражданский назначениян автомобиль да прицеп-влаклан кузов-фургоным ыштымаш шотлалтеш. 2022 ий годсек «Красногорский КАФ» АО «Пашан лектышыже» нацпроектыш ушнен. Предприятийыште фургоным ямдылыме пашам ончыктышо проектым илышыш шыҥдарат. 2023 ий январь–августлан комбинат 4 миллиард теҥгеаш продукцийым ыштен луктын. Тидыже 2022 ий дене таҥастарымаште 114,9 процентлан шукырак. Тенийлан план почеш 6,5 миллиард теҥгеаш сатум ыштен лукташ палемдыме. Производствым уэмдыме да модернизироватлыме сомыллан 45 миллион теҥгеаш инвестицийым ойырымо.
Заводым лӱмгечыж дене саламлаш Марий Элым Вуйлатыше Ю.Зайцев миен.
«Таче кундемнан ик эн виян предприятийже 95 ияш лӱмгечыжым палемда. Ты жапыште тудо тӱрлӧ зияным эртен, нелылыкым чытен да уэш нӧлталтын. Тачысе кечылан йол ӱмбалне пеҥгыдын шога. Тидыже коллективын икоян, ончыко пырля каяш кумылан улмыж нерген ойла. Тыгай пашаеҥ-влак дене кугу кӱкшытыш шуаш, ончыко ӱшанлын ошкылаш лиеш. Садланак, эртышым иктешлен, ончыкылыклан планым ыштыман. Кугу таум пашан ветеранже-влаклан каласыман. Нуно шке паша опытышт дене самырык тукымым палдарат.
Чылалан пеҥгыде тазалыкым да у сеҥымашым тыланем. Тек тендан шонымашда-влак илышыш пурталтыт. Йӧратыза шке заводым, посёлкым, Марий Элым да пӱтынь Российым!» – каласен Ю.Зайцев.
Тудын ойлымыж почеш, предприятийыште ыштыме сатун образецше-влак технический характеристике дене вес эл гыч кондымо сату деч нимынярат огыт ойыртемалт. Мӧҥгешла, эшеат сайрак да чаплырак улыт. Тысе специалист-влакын моштымашышт да заводын тидлан кӱлеш ресурсшо улмо сай продукцийым ямдылаш йӧным ыштат.
Ю.Зайцев Красногорский комбинатын генеральный директоржо Н.Ураевлан, 9-ше номеран цехын токарьже А.Ершовлан, 1-ше номеран цехын кугурак мастерже Л.Ивановалан да ты цехынак склейщикше В.Калеевалан Марий Эл Республик Вуйлатышын тауштымашан серышыжым кучыктен.