У ий вашеш шке кид дене иктаж-могай мотор сӧрастарышым ышташ лиеш. Ме тыланда вуйшӱдышла койшо У ий кожиме аршашым ямдылаш темлена.
Тидлан кӱлыт: картон стакан, ужар, ший але нарынче да йошкар тӱсан йылгыжше кӱжгӧ кагаз (глиттерный фоамиран), клей, клеитлыме автомат.
Изирак аршашлан картон стаканын вуйжо гыч вуйшӱдышыжым иктаж кок сантиметрым канцеляр кӱзӧ дене пӱчкын луктына. Тушко 30 сантиметр кужытан да 2 сантиметр лопкытан кагаз гыч пӱчкын лукмо ныл полоскым ямдылена. Тудын уло кутышыжымат шерге гай коймо семын тыгыдын пӱчкеден каена да, саде вуйшӱдышыш, йожекла пыштен, ӱмбала-ӱмбала клей дене пижыктена.
Вара тиде стаканынак оҥгыжым ший тӱсан глиттерный кагазыш (ош могыржым) чертитлена да кружокым пӱчкын луктына. Тудым пелыгыч пӱчкына да колпачокым ыштена, вашла клей дене пижыктена. Колпачок семын койшо кок йыҥгыр кӧргыш кугу йошкар шерым клеитлена. Иктым огыл, шер-влакым пырля пижыктылме кужу шерым ужалат, тудым йыҥгыр деч кужуракым, тушеч койжо манын пӱчкын келыштарена. Кок йыҥгырым пырля клей денак ушена.
Йошкар тӱсан глиттерный кагаз гыч 6 см лопкытан да 6 см кужытан квадратым пӱчкын луктына. Тудын дене бантикым келыштарена. Тудым огыда мошто гын, интернетыште улшо ямде трафарет дене пайдаланаш лиеш.