Кундемыштына «Вуйлатышын ёлкыжо» пайремым эртараш тӱҥалме. Икымше тыгай пайремым 19 декабрьыште Йошкар-Олаште Курчак театрыште почмо.
«Вуйлатышын ёлкыжым» ынде икмыняр ий эртарат. Тушко 1-5-ше класслаште тунемше, олимпиадылаште, шанче, технический, усталык конкурслаште, ончер ден фестивальлаште, спорт таҥасымашлаште сеҥышыш лекше-влакым, тыгак йоча мер ушемын активистше-шамычым ӱжыт. Пытартыш ийлаште тушко СВО-што улшо боец-влакын йочаштым иквереш погаш тӱҥалыныт.
Ачаштым шоналтен, сайлан ӱшанен, икшыве-влак мотор кож йыр пӧрдын мурен-куштеныт.
Кажнылан – шере пӧлек
Тиде кечын кундемнан тӱрлӧ районжо гыч 1-5-ше класслаште тунемше 1000 утла икшыве погынен. Пайремыш шуко икшывым авашт конден, тыгодым туныктышо-влак дене пырля толшо йоча-шамычат ыльыч. Куаныше, но тыгодым изиш тургыжланыше койын. Мо тыгай спецопераций – йоча-влак таче сайын палат. Ачашт элнан виян да тале патриотышт улыт. А южо икшывын тушто лишыл еҥышт порысым шуктышыла илыш дене чеверласеныт.
У ий пайрем йоча-влакым пуйто йомакысе тӱняш пӧртылтен, изиш чоныштым лыпландарен. Курчак театрын кокымшо пачашыштыже мотор кож шога. Тудым сылне модыш-влак дене сӧрастарыме, гирлянде дене сайын волгалтарыме. Калыкшат шуко, У ий шӱлыш шижалтеш.
Театрыште У ий шӱлышым, пайрем кумылым артист-шамыч сайын пуртеныт. Нуно, йомакысе тӱрлӧ персонаж лийын, йоча кумылым налын моштат, кож йыр пӧрдаш, мураш-кушташ, модаш ӱжыт. Варажым пайремыш Йӱштӧ Кугыза ден Лумӱдыр тольыч, йоча-влакым куандарышт.
Марий Элым Вуйлатыше Ю.Зайцев йоча-влакым шокшын саламлыш:
– Пӧлекым кучыкташ лӱмын тендан деке толынам. Шонымашда тек шукталтеш, илышда сай лиеш. Пиалан лийза! У ий дене! – пелештыш тудо.
Тиддеч вара кажне йочалан шере пӧлекым кучыктышт. Чылан «Снежная королева» спектакльым ончышт.