Республикысе коваште-венерологический диспансерын специалистше-влак Меланома ваштареш кучедалме тӱнямбал кече вашеш чыла кумылан-влакым дерматоскопий метод почеш тергаш ӱжыт.
18-21 майыште 9 гыч 12 шагат марте Йошкар-Оласе Патриарший площадьыште (Марий курчак театр воктене) дерматоскоп аппарат дене ончымаш эртаралтеш. Дерматоскоп коваштым утларак келгын шымла. Тудын дене рак чер шарлаш тӱҥалмыжым рашемдаш лиеш.
Палемдыман, меланома – коваштыште лӱдыкшӧ пуалмаш (злокачественная опухоль), тудо «меланоцит» манме клетке гыч вияҥеш. Меланоцит меланин пигментым луктеш. Лач меланоман писын вияҥ толмыжо, меланиным шуко лукмыжо, утларак лӱдыкшым ышта. Шукыж годым еҥ шке черле улмыжым огешат пале, меланомым шочмо пале (родинка) дене луга.
Валентина Семёнова.