Телым шӱргӧ коваштылан веле огыл, тыгак капкыллан, кид-йолланысе, тӱрвылан тӱткышым ойырыман.
Кап коваште мотор кодшо манын, капым пушкыдо шовын дене мушман. Составыштыже глицерин да тӱрлӧ кушкыл ӱй улмым шотыш налман. Утыж дене шокшо вӱд дене мушкылтман огыл. Мушкылтмо деч вара коваштыш вӱдыжтарыше кремым йыгыман.
Кид коваштым йӱштӧ годым аралаш эн неле. Садлан тудым эреак шокшышто кучыман, шокшо пижым але перчаткым чийыман. Коваштым аралаш да пушкыдемдаш манын, келшыше крем дене пайдаланыман.
Тӱрвӧ коваште изи температур годым чот орлана: вашке кошка да шелыштеш. Садлан тудым эреак вӱдыжтарыман. Тидлан гигиенический помадым але бальзамым кучылтман. Тудым уремыш лекме деч ончыч веле огыл, пӧртыштӧ улмо годымат йыгыман.
Шӱргӧ коваштым телым поснак чын аралыман. таза да ару лийже манын, коваштылан келшыше косметике дене кажне кечын пайдаланыман. Тыгак мом кочмым да йӱмым шотыш налман.