Марий Элыште Оперативный штабын черетан заседанийже лийын. Тушто у коронавирус инфекций шарлыме нерген мутланеныт.
Кокла шот дене арняште республикыште 350 еҥ черлана, кажне кечын 50 утла еҥ. Тидыже октябрь дене таҥастарымаште шукырак. Кызыт республикысе лу медицине организацийыште 1494 вер уло. Тушто1175 еҥ эмлалтеш.
Лишыл жапыште Марий Элыш 588 дозо «Гам-КОВИД-ВАК» вакциным кондышаш улыт.
Медицине пашаеҥ-влак поснак кугу рискыште улыт. Нуно кажне кечын черле-влак дене вашлийыт. «Йошкар зонышто» пашам ыштыше медицине персоналын йочашт-влакым «Журавушка» социально-реабилитационный рӱдерыш колташ йӧн лиеш. Тушко 7-17 ияш йоча-влак 14 кечылан каен кертыт. Кызытеш 37 еҥлан вер уло гын, идалык мучаш марте 74 йочалан верым келыштарат. 2021 ий январь-февральыште 148 икшывылан вер ситышаш.
Тыгак Правительстве пӧртыштӧ Оперативный штабын заседанийже годым #МыВместе акцийыш ушнышо волонтёр-влаклан медальым кучыктеныт.
Нуно 15 март гыч тачысе кече марте начар тазалыкан да кугурак ийготан еҥ-влаклан полшат. Шарныктыш медаль дене Лариса Лоскутова, Николай Засорин, Денис Клименчук, Валерий Утросин, Мария Герасимова палемдалтыныт.