Марий Элым Вуйлатыше Ю.Зайцев «Единый Россий» партийын Председательже Д.А.Медведевын регионысо мер приёмныйыштыжо еҥ-влакын йодышыштлан вашештен.
Еҥ-влак машина корно ден тротуар-влакым тӧрлымӧ шотышо йодыш дене лектыныт. Кужэҥер посёлко гыч В.Сидоркин Заречная уремысе корно ужаш шотышто вуйым шийын.
– Ты корно участке еҥ-влаклан кошташ йӧнан огыл, тыгак транспорт дене кудал пураш нелылыкым луктеш, – манын тудо.
Ю.Зайцев Кужэҥер районышто икмыняр объектыште пашам шуктымо нерген ойлен да тений ты корно участкым ачалаш планыш пурташ шӱден.
Оршанке районысо Марково ялысе йочасадым вуйлатыше О.Сенцова Восточная уремыште корным тӧрлаш йодын. Тудын мутшо почеш, тораште огыл йочасад, ФАП верланеныт, тыгак тушеч школ автобус кудалыштеш. Ты корным августышто шотыш кондаш тӱҥалшаш улыт.
Йошкар-Ола гыч Р.Михеев Панфилов уремын ик могырыштыжо, Первомайский урем дене ушнымаште, йолын коштшо-влакын кумдыкыштым тӧрлаш йодын. Ты корно дене школыш, йочасадыш коштыт. Марий Элым Вуйлатыше тротуарым кок арняште ачален шукташ кӱштен.
– Эркын-эркын, но районлаште да олалаште корным ачалаш, посна участке-влакым шотыш кондаш тыршена. Чыла йодышым тений кеҥеж мучаш марте решатлен шуктышаш улына, – манын Ю.Зайцев.
Марий Элым Вуйлатышын администрацийжын информаций паша пӧлкажын уверже-влак негызеш ямдылыме.