Тений Марий Элыште нацпроект почеш 42,2 км корным ачалаш палемдыме.
Ты шотышто 2023 ийланат конкурсым эртыме. Тунамат нацпроект почеш 40 км корным тӧрлышаш улыт. Тений ачалышаш чумыр кужыт 301 километрыш шуэш. Марий Элысе транспорт да корно озанлык министр А.Герасименкон мутшо почеш, ты план деч 40-50 км утларак тӧрлаташ палемдалтын.
Волжск ола Чуваший ден Татарстан чек воктене верлана, сандене транзитный корно пеш писын локтылалтеш. Оласе ныл уремым, 7 километрым, республикын балансышкыже пуаш палемдыме.
Шукерте огыл А-295 федеральный кугорнын 93-шо километрысе участкыжым петырыме. Йошкар-Ола – Зеленодольск корнысо кӱвар моткочак шӱкшӱ. Грузовой машина-влак М-7 «Волга» кугорно дене кудал кертыт. Тӧрлымӧ пашам 15 июнь марте пытарышаш улыт.