24 майыште школлаште выпускник-влаклан пытартыш йыҥгыр йоҥга. Медведево районысо Нурма кыдалаш школынат куд ӱдыр-рвезыжлан тудо иктешлыше да ончыко кумда корныш ужатыше лиеш.
Шочмо йылмыжым йӧрата
Ксения Ласточкина – ты школын ик эн виян выпускницыже. Ӱдыр школын чапшым тӱрлӧ олимпиадыште да конкурсышто арален. Тудо марла сайын кутыра. Шочмо йылмыж дене кугешна.
– Тайлансола Ялем Нурма села деч кок-кум меҥге тораште верланен. Мый икымше класс гычак ты школышто тунемам. Школыш автобус кондыштара. Классыштына физике, математике предмет-влаклан утларак тӱткыш ойыралтын.
Мыланем шочмо йылмем моткоч келша, вет ешыштына ме марла кутырена. Кажне ийын марий йылме дене эртаралтше олипиадылаште уш-акылем тергенам. Районышто ятыр гана сеҥыше-влак радамыш логалынам, – каласкала Ксения.
Синтезатор – сай пӧлек
Ӱдырын лу ийым темымыжлан ачаж ден аваже синтезаторым пӧлекленыт. Тудын иктаж семым шокташ тунемаш эн кугу шонымашыже лийын. Тыге Ксения сем тӱням шке гыч шымлаш тӱҥалын. Аважат шке жапыштыже ансамбльыште мурен, шуко концертыште участвоватлен. Выпускнице шканже да лишыл еҥже-влаклан веле шоктымыж нерген ойлыш, ты сомылым утларакше кумылым нӧлташ шукта.
Жап эртымеке, Ксения видеоролик-влакым ыштылаш кумылаҥын. Кызыт шольыж дене влогым вӱдат, ӱдыр-рвезе-шамычым тӱрлӧ сомылым ышташ туныктат.
– Индешымше классыште тунеммем годым ты пашалан пижынна. Шольым тунам 1-2-шо классыш коштын. Тӱҥ шотышто кумылым нӧлтышӧ, оҥай видео-влакым войзена, тыгак иктаж-мом, мутлан, аппликацийым да молымат ышташ туныктена. Кызыт выпускной классыште улам да жапем тидлан утыжым укеат, манаш лиеш. Садлан войзымо сомылым тӱрыснек шольым виктара, – палдара К.Ласточкина.
Технический специальностьым налаш шона
Пытартыш йыҥгыр деч вара выпускник-влак кугыжаныш единый экзаменым кучаш тӱҥалыт. Вес арнян кушкыжмын математике, а кугарнян руш йылме дене экзаменым сдатлат. Тидлан нуно икмыняр ий ондакак ямдылалташ тӱҥалыт. Южышт репетитор дене шинчымашыштым нӧлтат. Ксения, мутлан, информатике предметым келгынрак тунемаш Йошкар-Оласе Политехнический лицейыш лӱмын кудалыштеш. Ӱдырын ойлымыж почеш, туштыжо выпускник-влаклан лӱмын келыштарыме занятий-влакым эртарат.
– Школышто руш йылме да математике дене экзаменым кучаш ямдылалтына. Тыгак мӧҥгыштӧ шке гыч ятыр жап тунемына. Ончыкыжым технический специальностьым налаш шонем, – мане выпускнице.
К.Ласточкиналан да школым тунем пытарыше моло ӱдыр-рвезе-влаклан экзаменым сайын сдатлаш да шонымашкышт шуаш тыланена. Корныда волгыдо лийже, выпускник-влак!
Авторын фотожо-влак.