МВД ГИБДД-н Марий Элысе управленийыштыже тений икымше пелийыште корно туткар шотышто ситуаций нерген каласкаленыт.
Марий Элыште тений январь-июньышто корно туткарлаште еҥ-влак колымо случай шагалемын – пел ий жапыште 20 тыгай аварий лийын. Шукыж годым йолешке-влакым машина перен шуэн але кок автомашина керылтме годым айдеме ӱмыр лугыч лийын. Тидын нерген 24 июльышто МВД ГИБДД-н Марий Элысе управленийыштыже эртаралтше пресс-конференцийыште ойленыт.
– Тений пел ийыште корно туткарыште 21 еҥ колен, ӱмашсе тыгаяк жап дене таҥастараш гын, ты цифр кок пачаш иземын – 2022 ий январь-июньышто 45 тыгай корно туткар лийын. Корнышто колышо кажне еҥ – тиде кугу ойго, садлан тыгай ДТП-м шагалемдаш манын, эре тыршена. Тидын годымак тений пел ийыште корно туткар-влак шукеммым палемдыман – 248 ДТП лийын, тушто 322 еҥ эмганен, ӱмаште 242 ДТП-ште 323 еҥ эмганен, – ойлен республикысе Госавтоинспекцийым вуйлатыше Ю.Есипов.
Айдемым ӱмыр лугыч ыштыше кажне кокымшо корно туткар уда корнылан кӧра лиеш. Тидын шотышто ситуацийым «Безопасные качественные дороги» нацпроект саемдаш полша. Тудлан келшышын, 2024 ий мучаш марте республикысе автомашина кудалыштме корнын 50 процентшым шотыш кондышаш улыт. Тидлан финансированийым кугемдыман. Регионысо автокорным ачалыме пашаш окса тыгак ойыралташ тӱҥалеш гын, вес идалык мучаш марте корнын 44 процентшым ачален шуктат. Тидын нерген Марий Элысе транспорт да корно озанлык министр А.Герасименко ойлен.
– Проектыш ешартыш оксам ойыраш манын, республикым вуйлатыше могырым моткоч кугу паша ышталтеш, – палемден министр.