Шыжым республикыштына тунемше-влаклан «Край родной, навек любимый» туриаде эртаралтеш.
Проектын тӱҥ шонымашыже – Марий Элысе тунемше-влакым спорттазаҥдыме туризм деке кумылаҥдаш, таза илыш-йӱлам кучаш, шочмо кундемым шымлаш шӱмаҥдаш.
Сентябрь мучаште Ӧршасе академик Л.И.Ожиганов лӱмеш тӱҥ школын тунемшыже-влак туныктышышт дене пырля «Ӧрша – Шабашан» маршрут дене ик кечаш походыш тарваненыт. Маршрутын кужытшо 6 меҥге наре лийын.
Тунемше-влак тиде кечым чытен-чытыде вученыт, садлан изи йӱрат кумылыштым ыш волто. Корно Марий Ӧрша, Кӧрдымучаш ялла воктеч шуйнен. Ик шагатат пеле гыч самырык турист-влак палемдыме верышке миен шуыныт. Шнуй памаш воктене йоча-влакым матушка Руфина вашлийын. Тудо йоча-влаклан Шабашан вер нерген каласкален, а вара тысе храмышке пуртен да тудым чоҥымо нерген ойлен. Шабашан дек кажне ийын тӱрлӧ кундем гыч шуко паломник толеш. Нуно Юмын Ава деч полышым йодыт, памаш вӱдым налыт. Юзо вӱд айдемым эмлен кертеш, маныт.
Кечывалым Шабашан ӱмбалне кава ояремын, чевер кече шыргыжалын. Экскурсий деч вара ӱдыр-влак кочкышым ямдылаш пижыныт. Рвезе-влак тыгодым пум тулото воктек нумалыныт. А вара клумбышто шӱкым пырля кӱрыныт, храмлан изиш полшеныт.
Кечывал кочкыш пеш тамле лийын: чыве шӱр, тушонко дене варыме макарон, лимонан тамле чай. Кочкын теммеке, кӱмыж-совлам мушмеке, чылан тулото йыр канаш шинчыныт, гитар почеш келшымаш да Шочмо эл нерген мурым муреныт.
Пӱртӱс лоҥгаште жап шижде эртен. Нойышо, пиалан йоча-влак мӧҥгыш тарваненыт. Шабашан шокшо кече тунемше-влакым Ӧрша села шумеш ужатен. Поход чылалан моткоч келшен. Шукышт тыгай походыш икымше гана миен коштыныт.
Ирина ВЕДЕРНИКОВА.