Корно правил – йочаланат, кугыеҥланат

Пытартыш жапыште Марий Элыште ийготыш шудымо ӱдыр-рвезе-шамыч дене лийше ДТП шукемын, палдарен Марий Элысе МВД-н Госавтоинспекций управленийжым вуйлатыше Ю.С.Есипов «Марий Эл» увер агентствын журналистше-влак дене вашлиймаште.

Тений 16 июньысо данный почеш, республикыште йоча да подростко дене 57 ДТП-м регистрироватлыме, тушто 16 ияш ик подростко колен, 63 ӱдыр-рвезе эмганен. Йошкар-Олаште тыгай ДТП 16,7 процентлан шукемын гын, Волжский ден Звенигово районлаште – 300 процентлан, Медведево районышто – 450 процентлан.

Йоча-йолешке (26 ДТП, 9 случайыштыже аварий йочалан кӧра лийын) ден йоча-пассажир-влак (30 ДТП) дене корно туткар-шамыч чӱчкыдынрак лийыт.

Кугыеҥ-влакын ийготыш шудымо икшывыштлан транспортым виктараш ӱшанен пуымышт ик эн тӱҥ проблемылан шотлалтеш. Ийготыш шудымо водитель дене лийше 11 ДТП-м тений регистрироватлыме, тушто 13 еҥ эмганен. Шым тыгай корно туткарыште йоча мототранспортым виктарен. Тений ДПС пашаеҥ-влак 16-17 ияш 50 наре подростко-водительым шогалтеныт. Тыгай годым ийготыш шудымо водительлан транспортым ӱшанен пуышо еҥым мутым кучаш шогалтыме шотышто йодышым рашемдат.

СИМ-влак (тыгай тӱшкаш электросамокат, гироскутер, электроскейтборд-влак пурат) йодышымат тарватыме. Марий Элысе Госавтоинспекций тыгай средства дене пайдаланыше еҥ-влаклан кудалышташышт посна верым ойыраш, тыгак бульварлаште, набережныйыште да йолын коштмо моло верыште 5км/ч деч писынрак кудалмым чарыме шотышто Йошкар-Ола администрацийыш темлымаш дене лектын. Тидыже электросамокат да моло тыгай средствалан кӧра лийше туткарым шагалемдышаш.

Кугыеҥ-влак, шарныза: икшывыдан лӱдыкшыдымылыкшӧ верч те мутым кучеда!

https://www.freepik.com/ сайт гыч налме фото.