Марий Элым Вуйлатыше Ю.Зайцев муниципальный район-влакын вуйлатышышт дене совещанийым эртарен.
Тушто «Лӱдыкшыдымӧ сай корно» нацпроектым илышыш пуртымо, олалаште да районлаште юнармий толкыным вияҥдыме, У ий каныш годым лӱдыкшыдымылыкым эскерыме да жизнеобеспечений системыште аварий лийын кертмым кораҥдыме нерген ойленыт.
Ю.Зайцевын палемдымыж почеш, Марий Элыште «Лӱдыкшыдымӧ сай корно» проект пашан лектышыже куандара, тидын шотышто моло регион-влак дене таҥастарымаште Марий Эл – 5-ше верыште.
Республикыште чылаже 153 юнармий отряд уло. Эн шуко юнармеец-шамыч Оршанке, Параньга, Марий Турек, Морко да Кужэҥер районлаште улыт. Юнармийлан полышым пуымо шотышто «Авангард» рӱдер – ик эн тӱҥ верыште.
Д.Речкинын фотожо.