Корно эшеат сай лиеш

13 июльышто Йошкар-Олаште Марий Элым Вуйлатышын пашажым жаплан шуктышо Ю.Зайцев Федеральный корно агентствым вуйлатыше Р.Новиков дене вашлийын.

Р.Новиков республикыште федеральный значениян 92 меҥге кужыт корным ачалашлан палемдыме план дене палдарен. Тудын ойлымыж почеш, регионысо корнымат тӧрлаш палемдыме. «Тений республикысе 301,18 меҥге да 22,67 меҥге олаласе корным ачалаш палемдыме. Туге гынат федеральный рӱдерын полышыжо кӱлешак», – ойлен Ю.Зайцев.

Корно озанлыкыште кызыт шукталтше паша-влакым писынрак мучашлаш манын, ешартыш шийвундо кӱлеш, сандене Ю.Зайцев Росавтодор вуйлатыше дек йодмаш дене лектын.

Ю.Зайцев да Р.Новиков дене паша вашлиймаш годым Йошкар-Оласе Ленинский проспект гыч Луначарский урем марте у корным тений сентябрьыште почшаш улыт манын ойлен подрядчик.

13 июльышто Марий Элысе Антикризисный рӱдерыште «Дорожные фонды в Российской Федерации: задачи и перспективы на 2022-2024 годы» темылан совещаний эртаралтын. Тушко Юл кундем федеральный округысо автомобиль корно управленийын территориальный органже-влакым вуйлатышышт погыненыт. «Тений ме 50 процент наре регионысо значениян да 85 процент наре Росийысе опорный сетьын корнылажым, тыгак 85 процент наре Йошкар-Оласе корным шотыш кондышаш улына», – ойлен Юрий Зайцев.