Тиде иктаж 20 ий ончыч лийын. Августышто авамын отпускшо годым ковам дек ялыш кудална. Мый, 16 ияш рвезе, пошкудо ялыш йолташем дек унала миенам. Авам 10 шагат кастене мӧҥгыштӧ лияш кӱштен гынат, йолташем дене ялысе клубыш дискотекыш кайыде ышна чыте.
Пелйӱд эрталтен, мӧҥгӧ каяш тарванышым. Шкеже лӱдынам, миен шуамат, авам шокшым пуа дыр манын шонкалем. Йыр корно дене каяш гын, эшеат кужун кучалтам ыле. Лучо вик корно дене куржшаш манын, шӱгарла воктенысе корно дене пеш ошкылам. Шӱгарла капка воктенысе меҥгыште тул нарынчын йӱла. Тул волгалтарыме верыш толын шуым да кенета тӱҥын шогальым. Ваштарешем ковамын пошкудыжо Николай Павлович толеш. Йоча годсек тудым пеш пагалем, поро кумылан айдеме. Пычкемыште палыме чурийым вашлиймемлан йывыртышымат. Пошкудо пӧръеҥ мотор костюмым чиен, пуйто пайремлан ямдылалтын. Тудат мыланем куанен. Саламлалташ кидем шуялтышым, но Николай Павлович пуйто тидым ышат уж.
– Пелашем ончалаш миен тольым. Эмлымверыште кия. Вашке шке декем наҥгаем, – пелештыш тудо.
– Шкеже могайрак улыда? – йодам тудын деч.
– Ынде нимо ок коршто, сай. Каплан моткоч куштылго, – шыргыжалын мане пӧръеҥ.
Изиш кутыралтымеке, мый шке корнем дене умбакыже ошкыльым. Николай Павлович ынде паремын аман, ӱмаште кеҥежым тазалыкше начаррак ыле. Тыге шонен, ял могырыш вашкем. Кочай кушко кая манын савырнен ончальым – шеҥгелнем иктат уке. «Ну, тале вет!» – шоналтышым тунам.
Миен шумекем, авам шиже, шагатым ончале, но нимом ыш ойло. Эрлашыжым эрдене авам ден ковамлан Николай Павловичым вашлиймем нерген каласкалышым. Нуно коктынат вашла ӧрын ончальыч. Николай Павлович кок арня ончычак шӱм чер деч колен улмаш. Пелашыже чот ойгырен да эмлымверыш логалын.
Вес кечынже пален нална: Николай Павловичын пелашыже эмлымверыште колен. Пӧръеҥ мыланем ойлымыж семынак ыштен – тудым шкеж дек наҥгаен.
Владимир.
Звенигово район.
Интернет гыч налме фото.