Морко район Кораксола тӱвыра пӧртыштӧ черетан Марий кас эртаралте. Тудым тӱвыра пӧрт пеленысе «Муро кумыл» фольклор ансамбль сӧрастарыш. Ярансола ялын эн чолга эргыже Вениамин Андреевич Борисов гармоньжым шокталтыш, сылне марий семжым йоҥгалтарыш. Калык гармонь йӱкым колешат, чонжо йывыртен колта. Кажныже шке йӧратыме мурыжым муралташ вашка. Сылне марий мурылам куштымаш-влак алмаштышт, марий калык модышлан жап ойыралте, мыскара сценке ончыкталте, почеламут-влак йоҥгышт.
Ме кугезе йӱламат огына мондо. Марий касыш кажныже ожнысо марий кочкышым ыштен толын. Мый шкеже мелнам кӱэштынам, а весе-влак ӱян муным, салмамуным, перемечым да тулеч молым конденыт.
Лач тыгак калык коклаште ваш келшымаш пеҥгыдемеш, икте-весе деке поро шӱлыш шочеш.
Елена Григорьева, Кораксола тӱвыра пӧрт вуйлатыше.