Шукерте огыл Морко районышто «Виктория» муро таҥасымаш эртыш. Тудо Кугу Ачамланде сарыште сеҥымылан 80 ий теммылан пӧлеклалтын.
Районысо чыла 23 клуб тышке ушнен. Ик мурымак нигӧат йоҥгалтарен огыл, кажне клуб у деч у мурым верештын да мурен. Тидыже самырык тукым коклаштат патриотизм шӱлышым вияҥдаш полша, илалше-влакынат чоныштышт шке тукымысо Талешке-влак деке пагалымаш да кугешнымаш тулым шочыкта. «Муро кумыл» ансамбльна кок мурым йоҥгалтарен: «Йӧратымашым пӧртылта салтак» да «Пограничникын мурыжо». Кокымшо мурынаже 3-шо верыш логалын, тудым гала-концертыште муренна.
Елена Григорьева, Кораксола тӱвыра пӧрт вуйлатыше.
Снимкыште: Кораксола тӱвыра пӧртын «Муро кумыл» ансамбльже гала-концертыште.