Тӱвыра пӧртын пӧрдемыштыже йоча-влакым керек-кунамат куанен вучена. А каникул жапыште нуным тӱрлӧ сынан мероприятийлашке толаш кумылаҥдаш тачысе саманыште нелырак гынат, мемнан Кораксола ялысе икшыве-влак вуйым огыт шупш.
Кугергинмыт ешым поснак палемдынем. Ешыште ныл икшыве кушкеш: Ангелина, Давид, Богдан да Даниэль. Нуно икте-весышт дене пеш келшен илат. Теве кеҥеж жапыште Кораксола тӱвыра пӧртна пелен «Кече» лӱман сводный отрядын пашам ыштыме жапыштат, кеҥеж гоч ялысе икшыве-влак дене мероприятийлам эртарыме годымат, шыже каныш годым Марий Эл Республикнан пайремжым палемдыме татыштат – чыла годымат Кугергинмыт еш мемнан деке куанен коштыныт.
4 ноябрьыште клубыштына кум мероприятий эртаралте, тушто адакат нине чолга йоча-влак кугу усталыкым ончыктышт. «Мемнан элна – Россий» сӱрет таҥасымаште, «Йӧратыме Марий Элем» викториныште да «Пу кидетым, йолташ!» акцийыште шке вий-куатыштым тергышт.
Шӱргыял школышто тунемше моло икшыве-влакат Кораксола тӱвыра пӧртнан сай йолташыже улыт. Нуно, мемнан деке толыт, усталык памашыштым вияҥдат. Йоча-влак дене художественный вуйлатыше В.Г.Кириллова тӱрлӧ сынан мероприятийым эртара. Кызыт Вероника Геннадьевна дене Шӱргыял школысо тӱҥалтыш класслаште тунемше-влак Ава кечылан ямдылалтыт. Шке кидышт дене пӧлекым ыштат.
Ӱшанен кодына: ончыкыжымат мемнан деке йоча-влак уло кумылын кошташ тӱҥалыт. Тидланже ме нунылан таум веле ойлена.
Елена Григорьева, Кораксола тӱвыра пӧртым вуйлатыше.
Снимкыште: Марий Элын кечыжлан пӧлеклалтше мероприятийлаште чолгалыкым ончыктышо Кугергинмыт еш.