Кораксола клубын паша ярымже эре ик верыште ок шого. А тидланже клубна пелен чапланыше «Муро кумыл» фольклор ансамбль пеш кугу надырым пышта. Тудын репертуарыштыже чыла тошто муро-влак йоҥгат. Тидыжак ончышо калыкын кумылжым савыра. «Муро кумыл» икоян мурышо ешым эше 2010 ийыштак Г.Иванова чумырен да вуйлатен. Галина Михайловнан сомылжым таче В.Кириллова шуя.
Ансамбльыште тӱрлӧ ийготан мурызо уло. Тошто мурым йоҥгалтарымаш, кугезе йӱлам аралымаш – чылажат ты коллективым иктыш уша да тӱвыргӧ паша лектышым пуа. Ансамбльыште эн кугу ийготан участницылан С.Соколова шотлалтеш. Светлана Георгиевна Морко район Панайке ял гыч. Мемнан Кораксола ял марте корно кужу, но тидыже Светлана Георгиевна ден Василий пелашыжлан нимыняр чаракым ок ыште.
Г.Иванова, В.Игнатьева, С.Эманова, Е.Кириллова, С.Филиппова, Н.Николаева да В.Кириллова ансамбльын чолга участницыже улыт. Нуно нигунамт огыт сӧрвалтаре. Ик семын вургемым келыштарен чиен колтат, йыр шогалын, сылнын муралтат.
Ты коллектив кушко гына миен коштын огыл, кажне гана порын вашлийыныт. Йошкар-Олаште Республик кӱкшытан «Угинде» пайремыште, Марий касыште пагалыме уна лиймына тачат поро шарнымаш семын кумылым вӱчка. Шукерте огыл канде экран гоч «Пошкудем» передачыште адакат мемнан Кораксола клубын чолга артистышт-влак Шорыкйол пайремым модын ончыктышт. Икмыняр ий ончыч «Муро кумыл» ансамбльышкына Р.Иванова коштеш ыле. Роза Николаевнан яндар йӱкшымат калык куанен колыштын. Таче ты мурызым шке ешыштына ужнена.
А эше икмыняр идалык ончыч мемнан куштышо ансамбльна ыле. Т.Семёнова, Б.Эманов, Н.Сергеева, А.Александров тыге лывыргын тавалтен колтеныт, шарналтена да чонышто кугешнымаш кумыл ылыжеш. А молан тачысе кечын чыла нине пагалыме, талантан артистна-влак дене уэш куштышо ансамбльым чумыраш огыл? Ме нуным эреак куанен вучена.
Мый уло чонем дене «Муро кумыл» ансамбльлан пеҥгыде да сай полышым пуэн шогышо тале гармонист, Ярансола гыч Вениамин Борисовлан уло коллектив лӱм дене шӱдӧ пачаш тау мутым каласем. Ты уста айдеме нигунамат ок сӧрвалтаре, керек-кунамат мыланна полыш кидым шуялта да сеҥымашыш шуаш полша.
Елена Григорьева, Кораксола клубын вуйлатышыже.
«Муро кумыл» ансамбльын архивше гыч налме фото-влак.
