Ӱмырем мучко мыйын йырем корак пӧрдеш. Тудым изиэм годсек шарнем. Коляскыште шинчымем годым ваштарешем корак толын да тӱткын шинчашкем ончен. Тыгай шарнымаш тачат шинча ончылнем сӱретлалтеш. Йоча годсо ик фотокартычкыште тыгак коракым пуйто ончыктем. Тыге лектеш: тудын дене кылна изи годсек лийын. Тылеч вара мӧҥгысӧ телефоныш чӱчкыдын йыҥгыртеныт да нимом ойлен огытыл. Коклан, йӱдым помыжалтмекем, коракын шинчажым ужынам…
Кугу лиймекем, тидын нерген утларак шонаш тӱҥалынам. Ала тудо мыйым ты тӱняште иктаж осал пашалан кумылаҥдынеже улмаш? Черкыш коштшо еҥ улам, аралтышем виян да сеҥен огеш керт манынат южгунамже шонем. Вес тӱняште осал дене вашлияш огыл манын, чот кумалам!
Нина К.
Юрино посёлко.