Угарман кундемыште следж-хоккейым йӧратыше команде-влак коклаште Всероссийский лигын кокымшо йыжыҥже лийын. Марий Элын чапшым тушто спецоперацийын ветеранже-влакын «Ратник» командыже арален. Нуно ты таҥасымашыште той медаль дене палемдалтыныт.
Каласыман, Марий Элысе следж-хоккей дене командым чумырымылан але ик идалыкат уке. Кундемыштына адаптивный хоккейым вияҥдаш кӱлмӧ йодыш дене «Защитники Отечества» фондын регионысо филиалжын вуйлатышыже, Патырлык орденын кавалерже Ренат Магсумов Марий Элым Вуйлатыше Юрий Зайцев деке лектын. Тыге 2025 ий мартыште герой-влаклан хоккей дене модаш экипировкым, кӱлеш арверым наледеныт да ий ӱмбак лектыныт. Тачысе кечылан командын копилкыштыже кугу таҥасымашла гыч кок той медаль аралалтеш. Чылажат – ончылно.
«Защитники Отечества» фондын ВК-се тӱшкаж гыч налме фото.