Валентин Герасимов (фотошто пурлаште) Самара область Рощинский селаште верланыше 30-шо посна мотострелковый бригадыште конракт почеш служитла.
Рвезе Параньга район Осыялыште шочын-кушкын. Матародо школышто 11 классым тунем лектын. Школым тунем пытарымеке, армийыш каяш повестке толын.
— 2013 ий 12 декабрьыште армийыш каенам. Свердловск кундем Елань оласе частьыш логалынам, водитель-механик лийынам. Пел ий гыч Оренбург область Тоцкое селаште верланыше 12128 номеран войсковый частьыш, разведротыш кусареныт. БМП-2 машина дене кудалыштынам, ондакысе семынак водитель-механик лийынам. Туштак мучаш марте службым эртенам. Вара контракт почеш кум ийлан служитлаш кодынам – ойла тудо.
Молан лач тиде корным ойырен налынат манын йодмемлан рвезе тыге вашештыш: «Ялыште паша уке, оксам шагал тӱлат, а илаш кӱлеш. Тыгодым ончыкылык нергенат шоныман. Сандене шочмо вер деч тораште пашам ыштем. Паша келша. Тӱрлӧ кундем гыч йолташ-влакым муынам».
— Валентин, тый ынде вич ий тыште служитлет, опытет кугу. А тиде жапыште могай событий поснак шарналт кодын?
— Тӱрлӧ оҥайжат лиеден, чылажым шарненат от шукто. Шуко еҥ дене палыме лийынам. Тӱрлӧ кундемлаште илыше-влакын йӱлаштым пален налынам. Южгунам шке шочмо йылме мут-влакымат вашла таҥастарена.
— Тугеже служитлаш келша. Умбакыжат тыштак кодаш шонет?
— Ондак военный лиям манын шонен омыл, но илыш тыге шынден. А тиде пашаште пенсийыш лекмешкем ышташ шонем.
— А еш? Самырык еҥлан ӱдырыи налман вет.
— Тидын нерген але шонен омыл. Иктаж-могай вашталтыш лиеш гын, тунам вес шонымаш лектеш.
Тыгерак таче контракт дене служитлыше ик самырык еҥ дене палыме лийна. Пашам ыштат, элнам аралат, а яра жап лекме годым канат. Мутат уке, пашашт денат палдараш лиеш ыле, но чыла режим почеш, ик кече вес кечым покта. Да шукыж годым тидын нерген ойлашат ок лий.