Коншудо вӱдым вӱрым эрыкташ, шодо, мокш да шондыгалта черым эмлаш йӱыт. Коншудо лышташ дене примочкым да припаркым сусырыш, йораш, тыгак моло коваште пуалмыш оптат. Кеҥежым свежа лышташым вигак пышташ лиеш. Но организм гыч шлакым эрыктен лукмыж дене коншудо поснак пайдале. Вет ты кушкылышто клетчатке ден пектин шуко.
Шолым да мокшым эрыкташ манын, эмалироватлыме атыш 1-2 кугу совла свежа коншудо лышташым пыштыза, ӱмбакыже 200 мл шокшо вӱдым темыза. Изи тул ӱмбалне 10 минут шолтыза, вара, тул ӱмбач кораҥден, эше пел шагат шинчыктыза да шӱрыза. Лемым пел стакан дене кечеш 2-3 гана тылзе йӱза.
Йыжыҥ таза лийже манын, 4 кугу совла коштымо да тыгыдемдыме лышташ ӱмбак ик стакан шокшо вӱдым темыза, 15 минут шолтыза. Вара йӱкшаш кодыза да шӱрыза, шолын пучышо вӱд олмеш вӱдым ешарыза. Лемым ик кугу совла дене кечеш кум гана кочмо деч ончыч эре йӱза.
Кокырымо да кылмен черланыме годым 4 кугу совла тыгыдемдыме лышташ ӱмбак 200 мл шокшо вӱдым темыза, кок шагат шинчыктыза да шӱрыза. Лемым пел стакан дене кочмо деч ик шагат ончыч кечеш кум гана йӱза.
Стоматит годым 5 кугу совла тыгыдемдыме шудо ӱмбак пел литр шокшо вӱдым темыза, ик шагат шинчыктыза да шӱрыза. Лем дене умшагӧргым кечеш икмыняр гана шӱалтыза.
Верге чер, вуй корштымо, атеросклероз да анемий годым ик кугу совла коштымо клевыр ӱмбак ик стакан шокшо вӱдым темыза. Пел шагат шинчыктыза да шӱрыза. Тудым кум ужашлан пайлыза да кечеш кум гана кочмо деч 20-30 минут ончыч йӱза.
Диабет дене орланеда гын, кок стакан писте пеледыш ӱмбак кум литр вӱдым темыза, лу минут шолтыза. Йӱкшаш кодыза да шӱрыза. Лемым кленчалашке темкален шындыза да холодильникыште аралыза. Тудым йӱмӧ шумо годым пел стакан дене йӱман. Тыге лемым йӱын пытарымешке эмлалтман.