Эн тале самырык туныктышо, педагог-наставник да управленец-влакым «Педагогический дебют-2024» республикысе конкурсыш вучат.
Мероприятий 11 ноябрь гыч 13 декабрь марте шуйна. Икмыняр номинаций лиеш: «Самырык туныктышо», «Самырык воспитатель», «Самырык виктарыше», «Самырык класс вуйлатыше», «Педагог-наставник». Кажне номинацийыште ик сеҥышым ойырен налыт. Нуно Российысе «Педагогический дебют-2025» конкурсын финалыштыже Марий Элын чапшым аралаш тӱҥалыт.
Конкурсыш ушнаш манын, 22 ноябрь марте документым да конкурслык материалым konkurs.mio@mail.ru электрон почтыш колтыман.
«Марий Элысе самырык педагог-влакын каҥашыштын» ВК-се тӱшкаж гыч налме фото.