4 мартыште Йошкар-Оласе строительный техникумышто «Новый мир» фестиваль-конкурс лийын. Тушко республикысе кум профессиональный тунемме тӧнеж ушнен.
Тудо тунемше-влак коклаште тазалыкын психике могырым иктаж-могай уто ситыдымашым рашемдаш полшаш але профилактике пашам шукташ келыштаралтын. Фестиваль годым тунемше-шамыч социальный тематике дене кылдалтше постановко-шамычым модыныт. Нуно подростко ден ача-ава кокласе кыл, вуйым аҥыртарыше вещества-влак дене пайдаланымын эҥгекше шотышто темым тарватеныт. Тыгак ораторство да сценыште шкем кузе кучымо шотышто мастер-классыште шуаралтыныт. Самырык-влакын койыш-шоктышыштым эскерыше да нунын дене тидын шотышто пашам шуктышо педагог-шамыч «йыргешке ӱстел» годым тӱрлӧ темым каҥашеныт.
Конкурсышто Йошкар-Оласе строительный техникумын «Новый мир» командыже ончылно лийын. Кокымшо верыште – Марий радиомеханический техникумын «Ассорти» командыже, кумшо – Марий чодыра озанлык техникумын «Экспериментальное творчество» усталык коллективше.
Строительный техникумын сайтше гыч налме фото.