
Тений мартыште «Мыйын шочмо ялем» конкурсым увертаренна ыле. Тушко шке шочмо ялын историйже (але легенде), кушто (могай кундем, ер, эҥер воктен) верланыме, мыняр еҥ илыме, тушто могай тӧнеж-влак улмо нерген возен колташ кӱлын. Ял гыч лекше палыме еҥ-шамычымат ончыкташ йодынна. Серыш-влак пуреныт, нуным газетыште печатленна. Утларакшым вес республикыште илыше марий-влак конкурсыш ушненыт. Сеҥыше-влакын лӱмыштым палемдена:
1 вер: Лев Сошин «Кандаш олык кокласе Олыкъял» да Надежда Минаева «Тынбай ялем-шерге кундемем».
2 вер: Нина Минликаева «Карамбал да Сюнь воктене».
3 вер: Александр Ипаев «Танып воктен Маняк ялем».
Сеҥыше-влакым саламлена. Шымленыт, кычалыныт, йодыштыныт. Шотан пашам колтеныт. Сеҥыше-влакым чапле пӧлек да чаптанык вучат.