Марий Элыште «Пушкин карте» программым илышыш шыҥдарыме дене тӱвыра учрежденийлаште 2051 мероприятийым эртарыме, 195,5 тӱжем утла билетым ужалыме.
Шуко самырык еҥ тиде карте дене концертлашке, вашлиймашлашке, спектакльлашке коштеш гын, киношко – изиш шагалрак.
Тений сентябрьыште тӱвыра учрежденийлаште самырык еҥ-влак 6,2 тӱжем билетым налыныт. 3,8 тӱжем утла билет театрыш, 1 тӱжем утла билет тоштер ден галерейыш, 669 билет тӱвыра полат ден клубыш каяш ойыралтын.
Пытартыш тылзыште Пушкин карте дене Э.Сапаев лӱмеш опер да балет Марий кугыжаныш академический театрыш, Г.Константинов лӱмеш Руш академический драмтеатрыш, Марий самырык театрыш, Т.Евсеев лӱмеш Национальный тоштерыш, Курыкмарий драмтеатрыш каяш билет ужалалтын.
Марий Элыште 50,5 тӱжем тыгай картым пуымо.