Кундемыштына икмыняр ий «Муро ӱмырым шуя» проект илышыш шыҥдаралтеш. Тудын почеш мурызо-влак республикнан тӱрлӧ районышкыжо, тыгак марий-влакын тӱшкан илыме вес кундемлашке концерт дене лектын кудалыштыт. Ты проектын авторжо – Морко посёлко гыч Лиана Ильина.
Икмыняр ий жапыште мурызо-влак Удмуртийыш, Татарстаныш, Киров, Угарман кундемлаш миен коштыныт. Пытартыш ийлаште ты пашашке у мурызо-влакымат ушаш тӱҥалме. Марий Эл мучко мурен моштышо талантан еҥ-влак ятырын улыт. Сандене нуным калыклан палдараш кӱлеш, кугу сценыш лекташ полшыман.
– Тӱвыра аланыште тыршенна, ты илышым сайын палена. Молан шке проектым ямдылаш да концерт дене кошташ огыл? Тидын нерген мурызо Валерий Чивановлан ойленам ыле. Тудо мый денем келшен. 2021 ийыште «Муро ӱмырым шуя» проект шочо. Тыге пашалан пижна. Эн ондак тушко Анатолий Зарецких, Александр Лопкин, Александр Марков коштыныт. Ончыкылан паша шуко, тӱрлӧ вере каяш шонена, – мане Л.Ильина.
Кызыт составыште улыт: Валерий Чиванов, Надежда Крылова, Надежда Степанова, Сергей Савинов, Людмила Купсольцева (Шой), Андрей Купсольцев, Александр Коновалов. Таче ме газетым лудшо йолташ-влакым ты проектыш ушнышо кок уста мурызо, Людмила Шой да Сергей Савинов, дене палымым ыштена.
Медицине аланыште – 26 ий
Кужэҥер район Шӱдымарий ялын ӱдыржӧ Людмила Купсольцева Марий Эл Республикысе кожно-венерологический диспансерыште 26 ий лаборанткылан пашам ышта. Тыгодым тудо мураш кумылан. Яра жапше годым ондак Йошкар-Оласе «Весела сем» самодеятельный фольклор ансамбльыш коштын, кызыт – «Ший полан» ансамбльын чолга участницыже. Андрей пелашыжат мураш-кушташ йӧрата, гармоньым сайын шокта.
Людмила Купсольцева кок ий ондак калык ончыко Шой псевдоним дене лекташ тӱҥалын. Тиде лӱмым шочмо ялже дене кылден. Тачылан куд мурыжо уло, эше кокытым лукташ ямдылалтеш. Икымше мурыжо «Школ пагытым шарналтем» маналтеш. Тудым шочыкташ поэтессе Х.Александрова ден семмастар, мурызо В.Апталиков полшеныт.
– 2020 ийыште республикыште медпашаеҥ-влак коклаште «Голос медицинской сестры» фестиваль эртаралте. Тушко районысо, оласе эмлымверла гыч участник-влак ушненыт ыле. Ансамбльыш коштмем шотыш налын, пашам гыч мыйым фестивальыш колтышт. Тиде конкурсышто мый Надежда Крылован мурымыжым икымше гана колынам да тудын яндар йӱкшылан моткоч ӧрынам. Тудак сеҥышыш лекте. Вара шонем: «Молан мылам тыге тӧчен ончаш огыл?» Надя мыйым калык коклаш лекташ кумылаҥден. Тышечак усталык корнем тӱҥале. Палыме мурызо Светлана Яндукова деке пел ий мураш тунемаш коштынам. А пытартыш ийлаште мурызо Марина Садован вокал студийыштыже заниматлем.
«Муро ӱмырым шуя» программе почеш Андрей пелашем дене пырля концертыш коштына. Кызытеш мый Кужэҥер, Звенигово, Советский районлашке миен шуынам. «Ший полан» ансамбль шагал огыл жапым налеш. Тудым пелашем, тыгак йолташ ӱдырем да тудын эргыж дене пырля чумыренна. Тышке тӱрлӧ профессиян, мураш-кушташ йӧратыше проста еҥ-влак коштыт. Ме Йошкар-Олаште Самырык-влакын полатыштышт погынена, концерт дене коштына, – мане Л.Шой.
Людмила Валерьевна ончыкылан музыкальный шинчымашым налаш шона. Тудын мурыжо-влак Марий Эл Радиошто йоҥгалтыт. Сандене иктаж-гана «Идалыкысе муро» фестивальышкат логалаш кумылжо уло.
Л.Купсольцева тыгак тӱрлаш йӧрата. Тӱрлызӧ И.Степанован «Марий тӱр» рӱдерышкыже тӱрлаш тунемаш коштеш. Марий тувырым, шовырым, ончылшовычым да молымат шкеак ышта. Тыгак мотор сӧрастарышым ямдыла.
Йӧратыме пашашт дене шӱдырла волгалтыт, калык деке куанен вашкат. Тӱрлӧ пашаште тыршат гынат, кажныжым муро-куштымаш иктеш уша. Ончыкылан эшеат палыме лийыт, еҥ-влак коклаште пагалымашым сулат манын моткоч ӱшанена!