Пытартыш жапыште ятыр тӱвыра пӧрт шке ансамбльже дене икте-весе деке лектын коштедаш тӱҥалын. Тидыже моткочак сай. Кунам вес клубышко унала миет, чоныштет у сескем ылыжын кая. Пашам умбакыжат ышташ кумыл утларак ешаралтеш. Еҥ дечын ятыр улан тунемын толат.
Шукерте огыл Кораксола тӱвыра пӧртат «Муро кумыл» фольклор ансамбль дене Чодыраял тӱвыра пӧртыш «Шочмо мланде – чон шепка» концерт дене миен кошто. Ме ты коллектив дене пырля икмыняр ий ончычат Юлсер кундемыш концерт дене лектеденна, но пытартыш жапыште лач Марий касым вел эртыше кеҥежым 8 ялыште эртаренна.
Чодыраял велыш мийымына 15 еҥан ансамбльланна моткочак келшен. Вет мемнан «Муро кумыл» ансамбльнаже 2010 ийыштак шочын, тудым Вероника Геннадьевна Кириллова вуйлата. Репертуарыштына утларакшым тошто муро-влак йоҥгат. А тошто муро кажне кугурак ийготан еҥын чонышкыжо логалеш. Самырык жапше ушеш возеш, куанле татше шинча ончылныжо сӱретлалтеш. Тачысе саманыште самырык еҥым тӱвыра пӧртыш пешыжак от кондо, шукыжым илалше-влак толыт. Тидыже адакат шонаш тарата: ончыкыжым клубышко кӧ кошташ тӱҥалеш?
Чодыраял тӱвыра пӧрт вуйлатыше Валентина Васильевна Павлова мемнам порын вашлийын. «Тӱрлемӱдыр» студий вуйлатыше Марина Тимербаевна Васильева студий мучко экскурсийым эртарыш. Мо ӧрыктара, концертнам ончаш погынышо калык коклаште самырыкрак-влак утларак ыльыч. Тугеже Арын мландыште тӱвыра алан кыртмен пашам ышта. Вет арамлан огыл тыште С.Чавайн, В.Крылов да моло тале ончылъеҥ-влак шочын-кушкыныт…
Ынде «Муро кумыл» фольклор ансамбльна черетан «Шочмо мланде – чон шепка» концерт программыж дене 10 февральыште Токперде ден Унчо кундемысе калык деке каяш шона.
Елена Григорьева, Кораксола тӱвыра пӧрт вуйлатыше.
