Морко районысо тӱвыра аланышке шукерте огыл «Концерт ден вашла коштына» проектым шыҥдаренна. Тушко тачысе кечылан Кораксола да Токперде тӱвыра пӧрт-влак ушненыт.
Кораксола тӱвыра пӧртын «Муро кумыл» ансамбльже Чодыраялыш, Токпердыш, Унчыш, Шеҥшыш да Шлань кундемышке миен коштын, «Шочмо мланде — чон шепка» концерт программе дене шке усталыкшым ончыктен. Чыла вере калык мемнам пеш порын вашлийын.
А шукерте огыл Токперде тӱвыра пӧртын чолга артистше-влак мемнан Кораксола ялыште чапле концертым ончыктышт. Калыкнат лыҥак погынен ыле. Меат нуным порын вашлияш тыршышна.
Эре тыге пеҥгыде кылым вашла кучаш тӱҥалына гын, паша лектышнат тӱвыргӧ лиеш. А тиде чылажат калык верч ышталтеш. Ынде Кораксола тӱвыра пӧрт пеленысе «Муро кумыл» ансамбльна Шале ден Осипсола велыш каяш ямдылалтеш.
