Конаков урем олан йӱдвел ужашыштыже верланен. Тудын историйже 1938 ийыште тӱҥалтышым налеш. Олан кундемжым кумдаҥдаш манын, воктенысе яллам ола дене пуртеныт да ик уремлан лётчик, Совет Ушем Герой Владимир Константиновичын Коккинакин (1904-1985) лӱмжым пуэныт. 1957 ийыште СССР-н Кӱшыл Совет Президиумын указше почеш марий литератор Александр Фёдорович Конаковын (1887-1922) лӱмжылан вашталтеныт. Ты урем Некрасов урем гыч тӱҥалеш да 7-ше №-ан школ тураште пыта. Тушто илыме пӧрт-шамыч, кевыт, почто верланеныт.