Тиде Йошкар-Олан ик эн тошто да рӱдӧ уремже. Луговой урем гыч тӱҥалеш да Ленин проспект марте шуйна. Революций деч ончыч Ярмарочный урем маналтын, молан манаш гын тушто кажне ийын кугу пазар эртаралтын. Чарла уездын Совет исполкомжын пунчалже почеш, урем красноармеец Н.Зарубинын лӱмжым нумалаш тӱҥалын, тушто у пӧрт-влакым чоҥеныт. 1938 ийыште Л.Толстой урем гыч тӱҥалын да Юбилейный площадь марте шуйнен. Тиде ийынак комсомоллан XX идалык темме лӱмеш Комсомольский урем манын лӱмдымӧ.
Комсомольский уремыште оласе паркын тӱҥ капкаже, 2-шо №-ан монча, Кресаньык пӧрт, да молат верланеныт.