17 августышто ВОИ-н Марий Элысе организацийлан 33 ий темын.
Ты кечын мер организаций«Ловись, рыбка!» черетан фестивальым
Советский район Удельное ял воктенысе пӱяште эртарен.
Тушто 9 команде лийын.
Эн ончыч Марий Элысе ВЦИК правам палыме шотышто модышым эртарен да кажныжлан изи пӧлекым кучыктен. Вара – таҥасымаш. Эн шуко килограмм колым (2,5 кг нужголым) Кужэҥер районын командыже кучен. Кокымшо верыш 2 кг карака дене Килемар районын командыже лектын. А У Торъял район гыч толшо-влак ик кило утла каракам кученыт. Нунылан кубок ден медальым кучыктымо, а чыла участниклан – кол фигуркым. Варажым тамле кол шӱрым шолтен кочкыныт.
Игече пеш шокшо шоген, сандене участник-влаклан куштылго лийын огыл. Таҥасымаш деч вара нуно йӱштылашат пуреныт, вет тораште огыл пляж верланен. Икманаш, сайын каналтеныт.