Мый изиэм годсек «Кугарня» газетым лудам. Моткоч келша ялыш лектын коштмыда годым ямдылыме материал-влак, поснак ялозанлык-влак нерген. Тыгак «Изи тӱня, кугу тӱня…» лаштыкым ончем. Ондак «Олимпымат» лудам ыле, поснак футбол обозрений-влак келшеныт, кызыт ала-молан тыгайже уке.
Шекланем: лудшо-влакын лекше йодышыштлан специалист-влак деч вашмутым налыда. Мыйынат йодышем уло. Шукерте огыл вес кундем гыч Йошкар-Олаш илаш кусненам. Ялыште колым кучаш йӧратенам. Тыштат ончем: Изи Какшан эҥер воктене эҥырвара дене шукын шинчат. Изи Какшан деч посна ола воктене эше кушто колым кучаш лиеш?
Егор.
Киров кундем – Йошкар-Ола.
Марий Эл Республикын Пӱртӱс поянлык, экологий да йырым-йырысе средам аралыме шотышто министерствыже умылтара:
– Еҥ-влаклан колым кучаш лийме вӱд объект-влак спискым 2018 ий 25 декабрьыште лукмо «О любительском рыболовстве и о внесении изменений в отдельные законодательные акты Российской Федерации» федеральный законын 6-шо статьяштыже ончыктымо.
Тылеч посна Волжско-Каспийский рыбохозяйственный бассейныште колым кучымо правилын 10.1 подпунктшо дене келшышын (РФ Ялозанлык министерстве 2014 ий 18 ноябрьыште пеҥгыдемден), еҥ-влакын тӱшкан пайдаланаш лийме кол озанлык вӱд объектлаште оксам тӱлыде кучаш правашт уло. Рыбоводный участкылаште кол озанлык-влакын келшымышт деч посна колым кучаш ок лий.
Марий Элыште кол озанлык-влакын спискышт дене министерствын официальный сайтыштыже «Аквакультура» ужашыште (https://mari-el.gov.ru/ministries/minles/pages/fish) палыме лийын кертыда.