8 ноябрьыште М.Шкетан лӱмеш Марий кугыжаныш драмтеатрыште Санян Вачин «Колумб» драмым ончышна. Премьерышке калык рӱж погынен толын.
Эн ончыч авторлан кугу таум каласыман, Валентин Колумбын илыш корныжым келгын, раш почын пуымо, чыла чыным ончыктымо. Постановкым Марий Эл искусствын сулло деятельже Василий Пектеев шынден, драме мучко ойгырен, чаманен, шортын ончышна. Шинчавӱд шкеак йога, мыняр нелылыкым, мыскылымашым самырык поэтлан чыташ пернен. Тынар тале, ушан айдемылан книгам печатлаш корным петыреныт, йырнык койышым шижаш, шуко игылтмым колаш логалын. Валентин Колумб поэт-влаклан эре порылык дене вашештен, но осал шӱм-чонанже тудым умылен огыл. Тудын семын у йöн дене возен моштен огытыл да чот кöраненыт. Драме мучко ме тиде чот кöранымашым шижына да ужына.
Артист-шамыч шке геройыштын образыштым тӱрыс почын пуышт. Тӱҥ геройым Иван Соловьев устан модо. В.Колумбын почеламутшо-влакым пеш чаплын лудо, мурат йоҥгыш. Светлана Скулкина, Светлана Сандакова, Олег Кузьминых, Алексей Юнусов, Иван Смирнов, Эдуард Яковлев, Генрих Тимиряев, Андрей Бусыгин, Марина Почтенева, Алексей Тетерин, Алексей Сандаков, Павел Ефимов, Наталия Алексеева, Светлана Филиппова, Сергей Данилов, Светлана Строганова, Елена Мочалова,
Ирина Кубекова, Александр Бирюков ончаш толшо-влакын кумылыштым савырышт.
Валентин Колумб марий поэзий каваште сылне, шонаш таратыше почеламут-влакым шочыктен, лудшо-влаклан конден шукташ тыршен. Тӱрлö чараклан, кöранымашлан кӧра савыктен огытыл гынат, тудо эре возен шоген. Чот шыгыремдымылан кöра самырык чонжо тыгай йырнык, осал койышым чытен огыл да илыш дене чеверласен. Тудо ӱшанен да пален: ончыкыжым сылнымутшым печатлаш да лудаш тӱҥалыт.
«Колумб» драмым ончаш вашкыза, тиде мемнан историй, тусо жапым палаш уто огыл, шонем. Марий поэт Валентин Колумб нерген шукырак пален налыда.
Роза Антропова, туныктышо
Советский район, Öрша села.
М.Шкетан лӱмеш театрын сайтше гыч налме фото-влак.